በአዲስ አበባ ለብዙሀን ትራንስፖርት ብቻ አገልግሎት የሚሰጡ 14 መስመሮች ይፋ ሆኑ

አገልግሎቱ በተመረጡት መስመሮች ላይ ከመጪው እሁድ ጀምሮ ተግባራዊ ይደረጋል የአዲስ አበባ ትራስፖርት ቢሮ በአዲስ አበባ ከተማ የሚታየውን የትራፊክ መጨናነቅ ለመቀነስ ለብዙሀን ትራንስፖርት ብቻ አገልግሎት ይሰጣሉ የተባሉ 14 መስመሮችን ይፋ አድርጓል፡፡ ቢሮው ይፋ ባደረገው መግለጫ ከትምህርት መከፈት ጋር ተያይዞ የሚከሰተውን መጨናነቅ ለማስቅረት ውሳኔው አስፈላጊ ነው ብሏል። ቢሮው የትራንስፖርት አገልግሎት አሰጣጡን ለማቀላጠፍ የብዙሀን ትራንስፖርት አማራጮችን መጠቀም ብዛት ያለው ሰው በአንድ ጊዜ እንዲመላለስ በማድረግ እና የመንገድ መዘጋጋትን ለመቀነስ እንደሚረዳ ገልጿል፡፡በዚህም ከመጪው እሁድ መስከረም 12 ጀምሮ የብዙሀን ትራንስፖርት የሚባሉት ከ8 ሰው በላይ የሚጭኑ ተሸከርካሪዎች ብቻ ይጓዙባቸዋል የተባሉ 14 መስመሮችን ቢሮው ይፋ አድርጓል፡፡ እነርሱም ከቦሌ- ፒያሳ፣ ከቦሌ- ሜክሲኮ፣ ከቦሌ- አራት ኪሎ፣ ከቦሌ- አውቶቢስ ተራ፣ ከቦሌ- ሽሮሜዳ፣ ከጀሞ- ፒያሳ እና ከጀሞ- ሜክሲኮ ናቸው፡፡በተመሳሳይ ከፒያሳ- ቦሌ፣ ከሜክሲኮ- ቦሌ፣ ከአራት ኪሎ- ቦሌ፣ ከአውቶቡስ ተራ- ቦሌ፣ ከሽሮ ሜዳ- ቦሌ፣ ከፒያሳ ጀሞ እና ከሜክሲኮ – ጀሞ የሚገኙ መስመሮች የብዙሃን ትራንስፖርት አገልግሎት ብቻ መሰጠት እንደሚጀምሩ በመግለጫው ተመላክቷል፡፡አዲስ ተግባራዊ ይደረጋል የተባለው አሰራር ከተማሪና መምህራን ባለፈ ሌሎች የከተማዋ ነዋሪዎች በሰዓታቸው ወደ ሚፈልጉት ቦታ በመንቀሳቀስ አገልግሎት እንዲያገኙ ያግዛል ተብሏል፡፡ተገልጋዮች የሚያጋጥሟቸውንና የሚስተዋሉ ችግሮችን በአቅራቢያ ለሚገኙ የትራንስፖርት ቁጥጥር ሰራተኞች ወይም በ 9417 ነፃ የስልክ መስመር ጥቆማ እንዲሰጡ ቢሮው ጥሪ አቅርቧል፡፡

Al-Ain