
ኢትዮጵያ የብሪክስ ባንክ በሆነው ኒው ደቨሎፕመንት ባንክ አባል ለመሆን እየሰራች ነው :: ኢትዮጵያ የብሪክስ ባንክ በሆነው ኒው ደቨሎፕመንት ባንክ አባል ለመሆን እየሰራች መሆኑን የውጭ ጉዳይ ሚኒስቴር አስታወቀ።የውጭ ጉዳይ ሚኒስቴር ቃል አቀባይ ነብዩ ተድላ በተለያዩ ጉዳዮች ዙሪያ ሳምንታዊ መግለጫ ሰጥተዋል።በቅርቡ በአዲስ አበባ ጉብኝት ያደረጉት የተመድ ምክትል ዋና ፀሀፊ አሚና መሀመድ ከውጭ ጉዳይ ሚኒስትር ታዬ አጽቀስላሴ ጋር ተገናኝተው በባለብዙ ወገን ዲፕሎማሲ ጉዳዮች ዙሪያ መምከራቸውን ተናግረዋል። የፊታችን ሀምሌ ወር ኢትዮጵያ 4ኛውን የፋይናንስ ለልማት ኮንፍረንስ በተሳካ ሁኔታ ለማካሄድ ዝግጅት እያደረገች መሆኑን ገልጸው፤ ለዚሁ ስራ ከመንግስታቱ ድርጅት እና ከሌሎች ዓለም አቀፍ ተቋማት ጋር እየተሰራ እንደሆነ ገልፀዋል።በተመሳሳይ ባለፈው ሳምንት በኢትዮጵያ እና ስሎቬኒያ መካከል የሁለትዮሽ ትብብርን ለማጠናከር ያለመ ምክክር መደረጉን ጠቁመዋል። የሊቢያ ጠቅላይ ሚኒስትር አብዱልሃሚድ አልዳባቢያ በአዲስ አበባ ያደረጉት ጉብኝትም ስኬታማ እንደነበር ነው ቃል አቀባዩ የተናገሩት፡፡በዚህም የሊቢያው ጠቅላይ ሚኒስትር ከኢፌዴሪ ጠቅላይ ሚኒስትር ዐቢይ አሕመድ(ዶ/ር) ጋር ሀገራቱ በጋራ በሚሰሩባቸው ጉዳዮች ዙሪያ ምክክር ማድረጋቸውንም አንስተዋል።በሩሲያ ሞስኮ ከተማ በተደረገው የብሪክስ አባል ሀገራት ምክክር በውጭ ጉዳይ ሚኒስትር ዴኤታ የተመራ የኢትዮጵያ ልዑክ መሳተፉን ገልጸዋል።ኢትዮጵያ የብሪክስ አባል የሆነችው ብሔራዊ ጥቅምና ፍላጎቷን ለማሳካት መሆኑንም አቶ ነብዩ ተድላ በመግለጫቸው አስረድተዋል።በምክክር መድረኩ የብሪክስ አባል ሀገራት ተሳትፎ መገምገሙንና ለቀጣይ የቡድኑ ስብሰባ ግብዓት የሚሆኑ ሃሳቦች መነሳታቸውን ጠቁመዋል፡፡ ኢትዮጵያ የብሪክስ ባንክ በሆነው ኒው ደቨሎፕመንት ባንክ አባል እንድትሆን በትኩረት እየተሰራ መሆኑንም አስታውቀዋል።በስብሰባው በዚህ ርዕሰ ጉዳይ ምክክር መደረጉን ጠቅሰው፣ የኢትዮጵያ ልዑክ ከአባል ሀገራት ተወካዮች ጋር በተለያዩ ጉዳዮች ዙሪያ ምክክር ማድረጉን ገልፀዋል።
More Stories
3ኛው የፓርላማ ዜጎች ፎረም እየተካሄደ ነው
ለታላቁ የኢትዮጵያ ሕዳሴ ግድብ የሚደረገው ድጋፍ እንዲጠናከር ጥሪ ቀረበ
ሚዛን ቴፒ ዩኒቨርስቲ ልዩ የአዳር ትምህርት ተመቻችቶ የመማር ማስተማር ስራ መጀመሩ የበለጠ ውጤት እንድናስመዘግብ አግዞናል ሲሉ በሚዛን ቴፒ ዩኒቨርስቲ ልዩ የአዳር ትምህርት እድል ያገኙ ተማሪዎች ገለፁ ።